Babi naw mis oed wedi marw yn dilyn ymosodiad ci

Mae babi naw mis oed wedi marw yn dilyn ymosodiad ci yn Sir Fynwy.

Dywed Heddlu Gwent eu bod wedi "derbyn adroddiad o ymosodiad gan gi" mewn tŷ ar stryd Crossway ym mhentref Rogiet, ger Cil-y-coed tua 18:00 nos Sul.

Fe gafodd swyddogion heddlu a pharafeddygon y Gwasanaeth Ambiwlans eu hanfon i'r cyfeiriad, ble y cadarnhawyd bod babi naw mis oed wedi marw yn y fan a'r lle.

Mae'r ci wedi cael ei symud o'r eiddo, medd y llu, sy'n apelio am wybodaeth.

Dywedodd y Prif Uwcharolygydd John Davies: "Rydym yn deall y bydd yna bryderon ynghylch y digwyddiad yma, ond mae swyddogion yn bresennol ac fe fyddan ni gwneud rhagor o ymholiadau wrth i'r ymchwiliad fynd yn ei flaen."

"Os oes gyda chi bryderon neu wybodaeth, dewch atom er mwyn siarad â ni."

Dywedodd pobl leol nad oedden nhw'n gallu credu bod babi wedi marw, a bod y gymuned mewn sioc.

Erbyn 22:00 roedd y rhan fwyaf o gerbydau'r Gwasanaeth Ambiwlans a'r heddlu wedi mynd, ac yn eu lle roedd timau archwilio manwl wedi cyrraedd.

Mae swyddogion heddlu yn parhau i fod ar ddyletswydd y tu fas i dŷ yn Crossways ym mhentre' Rogiet.

Mae hi'n dawel iawn ar y stryd fore Llun, yn wahanol iawn i'r olygfa nos Sul pan roedd nifer o gerbydau'r heddlu a'r gwasanaeth ambiwlans yma.

Mae Rogiet yn bentre tawel ger Cil-y-Coed nid nepell o'r pontydd dros Afon Hafren.

Mae nifer sy'n byw yma yn teithio i'w gwaith ym Mryste, gyda'r ardal wedi dod yn fyw apelgar ers i'r tollau dros y pontydd gael eu dileu rai blynyddoedd yn ôl

Dywedodd y Cynghorydd Peter Strong wrth y BBC fod y "pentref mewn galar heddiw".

"Mae o'n deimlad dwfn a dwys o sioc y gallai rhywbeth fel hyn ddigwydd yng nghanol ein cymuned dawel ni."

Ychwanegodd bod "colli babi yn yr amgylchiadau hyn yn ofnadwy", ac na allai "hyd yn oed ddechrau dychmygu'r galar y mae'r teulu'n ei deimlo'r bore yma".

Diolchodd Mr Strong i'r gwasanaethau brys, gan ganmol ysbryd cymunedol yr ardal, a gofyn i bobl roi llonydd i'r teulu.